Wednesday, 20 October, 2021

|

NHS-onnies leer hoe om Covid-spanning te klop

Kathy Knott, bekwame plaaslike beradingsielkundige, het verlede week met die personeel van Hoërskool Nelspruit kom gesels en raad gegee oor hoe om staande te bly in stresvolle tye.

“Die Covid-pandemie se invloed op die gees van die mens word ál meer gevoel. Onderwysers ervaar meer en meer daaglikse uitdagings. Sy verwys na die pandemie as ons eie oorlog wat ons daagliks teen ’n ongesiene vyand moet voer en dat dit ons geestelik en emosioneel uitput, omdat ons heeltyd paraat moet wees,” sê sy.

Knott het die belangrikheid van eie welstand aangespreek. Met haar kundigheid en jare se ervaring het sy verskeie wenke gegee oor hoe om staande te bly in hierdie onseker tye.

Lees ook: Drie silwertoekennings vir NHS se tienertoneel

“Dit is baie belangrik om na jou jouself om te sien. Eet reg, slaap goed, maak tyd om met jou geliefdes te gesels en oefen,” sê Kathy. Sy beklemtoon ook dat dit beslis waar is dat ’n gesonde liggaam ’n gesonde gees huisves en dat dit nie selfsugtig is om aan jou eie welstand te dink nie.

“Dit is jou verantwoordelikheid om mooi na jouself te kyk, juis sodat jy ook in staat kan wees om ’n positiewe bydrae te lewer in ander se lewens.”
Verder het sy die personeel aangepor om te fokus op dinge waarvoor hulle dankbaar kan wees.

“Daar is áltyd iets om voor dankbaar te wees, al is dit net ’n klein dingetjie.”
Volgens haar kan die mens hom positief programmeer deur te fokus op dit wat jy wél het.

Leave a Reply